Prindërit e 23-vjeçarit Albert Togu kanë kallëzuar në Prokurori mjekët e Spitalit të Traumës, për neglizhencë mjekësorë dhe i kanë bërë përgjegjës për vdekjen e të birit mëngjesin e sotëm.
Familjarët tregojnë për “News 24”, se djali i tyre ndodhej i shtruar në spitalin e Traumës si pasojë e një aksidenti rrugor.
Babi i 23-vjeçarit Albert Togu ka kallëzuar në Prokurori mjekët, pasi sipas tij, i riu ndërroi jetë nga neglizhenca.
I tronditur, Kujtim Togu thotë se trupi i të birit u transportua në Morg por ende nuk i është bërë autopsia.
Ai thekson se, mjekësia ligjore nuk mund të kryejë autopsinë pa kartelën e 23-vjeçarit, e cila nuk është lëshuar ende nga Spitali i Traumës.
Albert Togu u aksidentua një javë më parë në Gjorm të Kurbinit teksa ishte duke udhëtuar në automjet me 2 persona të tjerë, pasi automjeti tip “Audi” me të cilin ata udhëtonin, devijoi nga rruga dhe u përplas me barrierat anësore.