Deputeti socialist Erion Braçe ka shpërthyer në kritika të forta ndaj batërdisë që po bën Fatmir Bektashi me ndërtimet në Tiranë. Kompania e ortakut të familjes Berisha ka marrë leje për të betonizuar Farkën dhe sipas Braçes kjo është skandaloze.
“Dallgë betoni në kodrat e Farkës; Boll me këtë dallgë halucinante që këtu quhet baladë e atje quhet mangalem! Tani edhe ju që blini; Boll bletë që thjesht flini në konvikt, boll! Duhet një ekuilibër i ri mes natyrës dhe ndërtimit; Duhet tani! Dhe nis te bujqësia, jo te ndërtimi; Duhet bërë bujqësia të prodhojë më shumë para sesa pjesa e tokës bujqësore që shitet për t’u bërë dallgë”, shkruan Braçe.
Këtë kompleks me 142 vila, po e investon dhe ndërton kompania “Kontakt Sh.p.k”, që zyrtarisht është në pronësi të ndërtuesit Fatmir Bektashi, ndërsa faktikisht e ka në ortakëri me Argita Berishën e Jamarbër Malltezin, më të cilët ka ndërtuar kullat te ish-kompleksi “Partizani”.
Bektashi, nuk po e ndërton pa leje këtë kompleks vilash me stil “hangarësh” të projektuar nga një studio holandeze, por me leje nga Këshilli Kombëtar i Territorit, ku kryetar është kryeministri Edi Rama.
Kjo leje ndërtimi është fryt i pazarit të interesave mes Edi Ramës e Sali Berishës, ndërsa miliardat që po investohen te kompleksi “Ballada” buzë unazës në Farkë të Madhe, nuk dihet në çfarë vlere janë, si e kanë siguruar tokën pronë shtetërore dhe nga cilët burime vijnë miliardat. Skandali është se Fatmir Bektashi është me dy dosje në SPAK.