Eneo Bitri është një nga ata lojtarë, për të cilët tifozët kanë ende nostalgji dhe do të donin ta shihnin sërish të vishnte fanellën e kuqe.
Aktualisht pjesë e ETO Giorit në Hungari, në një prononcim ekskluziv për “Panorama Sport”, mbrojtësi flet për sezonin e tij dhe për zhvillimet e fundit tek ish-ekipi i tij, Partizani. Bitri flet për Gegën si trajner, me të cilin ka punuar më parë te “Demat”. Ai shprehet se tropojani do të bëjë ndryshime të rëndësishme. Nuk mungon një koment as për ndeshjen e radhës në Kupë kundër Egnatias.
Si po ju shkon ky sezon në Hungari? Jeni i kënaqur me paraqitjet tuaja?
Mendoj se në aspektin e statistikave ky sezon ka qenë më i miri në karrierën time, sepse kam shënuar 4 gola dhe ka dhënë një asist. Këto shifra nuk i kisha arritur asnjëherë më përpara në karrierë. Kam bërë një gjysmë sezoni shumë të mirë, por kjo gjysmë e dytë nuk më ka shkuar mirë për shkak se kam pasur disa probleme burokratike me klubin, çka janë zgjedhje për të cilat nuk mund të flas më shumë.
Skuadra duket se ka arritur të sigurojë mbijetesën. Jeni brenda objektivave?
Po, jemi brenda objektivave. Tani kemi një ecuri shumë të mirë, sepse nuk kemi pësuar akoma humbje për vitin 2025 dhe mendoj se me këtë ritëm mund të arrijmë të jemi edhe në katërshen e tabelës.
Ku do t’ju gjejë vera e ardhshme? Keni në plan të kryeni një tjetër transferim?
Unë kam edhe një vit e gjysmë kontratë me Valerengën në Norvegji. Nuk e di çfarë do të ndodhë, sepse vera është e gjatë. Dëshira ime është të jem diku tjetër, por të shohim se çfarë do të ndodhë.
Partizani riktheu në stol Skënder Gegën pas një krizë në javët e fundit. Ishte lëvizja e duhur?
Mendoj se është zgjedhja më e duhur që mund të kishin bërë, sepse Partizanit i duhen njerëz që e dinë sesa e rëndësishme është ajo fanellë dhe sesa peshon.
Ju keni punuar rreth gjashtë muaj me profesor Gegën, si është ai si trajner?
E vërtetë, ai ka qenë profesori im i parë te Partizani. Gega është një trajner dhe njeri shumë strikt në detyra dhe kërkon gjithmonë nga lojtarët që të kenë personalitet në fushë. Ai e di sesi krijohet një grup i fortë për të ecur përpara.
Partizani duket në vështirësi sa i përket lojës. Mendoni se Gega do t’i ndryshojë gjërat dhe do të fitojnë trofe?
Partizani i Gegës mendoj se do të jetë ndryshe. Pres të jetë shumë më agresiv dhe më “i uritur” për fitore. Për të arritur objektivat e klubit, mendoj se profesori do të sjellë një mentalitet dhe frymë tjetër te skuadra.
Ky Partizan nuk ka më liderë të ngjashëm me ju apo Belicën më parë. Sa i penalizon kjo?
Kjo pa dyshim ka ndikimin e vet, por mendoj se lojtari që duhet ta ndiejë veten lider dhe ta bëjë këtë rol është Preka. Me aq sa e kam njohur, kam vënë re se mund ta bëjë mirë atë pjesë. Vetëm i duhet pak kohë, sepse sapo janë larguar disa nga lojtarët kryesorë.
Kush ju duket rivali më i fortë i Partizanit në këtë sezon?
Nuk dua të përmend emra, por mendoj se të katërt skuadrat që ndodhën në pjesën e sipërme të renditjes do të rivalizojnë shumë fort njëra-tjetrës për të bërë të tyren Kupën dhe titullin kampion.
Sfida e radhës është përballë Egnatias për gjysmëfinalet e Kupës. Besoni se Partizani mund t’i eliminojë rrogozhinasit nga Kupa?
Do të jetë një përballje shumë e fortë, por nuk i dihet, sepse Partizani është ndryshe nga javët e kaluara. Normalisht do të nisë të ndihet edhe dora e trajnerit Gega. Mendoj se në fund të dy betejave, finalisti do të zgjidhet me shtesa dhe në fund do ta zgjidhë ekipi që do të tregojë kualitetin më të madh në fushë.