Ku shkoj unë, rriten të ardhurat, shkurtohen shpenzimet dhe humbjet dhe fitohen trofe”. Kështu thoshte Simone Inzagi me krenari kur në fushën e lojës rezultatet nuk po vinin dhe dikush nuk e konsideronte në lartësinë e duhur për ambiciet e Interit. Sot, dy muaj e gjysmë pas asaj fraze, thjesht duhet t’i japim Simones atë që është e Simones.
Që kur erdhi në Milano, trajneri ka sjellë në “Appiano” 6 kupa, një titull, 2 Kupa Italie dhe tri Superkupa, por mbi të gjitha ka çuar ekipin 2 herë në gjysmëfinale dhe 1 herë në finalen e Champions-it. Një tjetër rezultat i jashtëzakonshëm që e fut trajnerin në historinë e klubit. Vetëm Helenio Herrera përpara tij kishte arritur 2 gjysmëfinale në kompeticionin europian.
TË ARDHURAT- Përtej trofeve, Inzagi kishte të drejtë edhe në çështjen e të ardhurave. Mbrëmjet magjike të Champions-it në Milano janë duke sjellë të ardhura. Këtë vit, me kualifikimin mes 4 më të mirave, pavarësisht ecurisë së mëtejshme, Interi ka fituar 113 milionë euro. Një shifër që është rekord për klubin e Interit dhe që ka kaluar atë të finales përpara 2 vitesh.
Në atë kohë, Interi arkëtoi 101 milionë euro, ndërsa këtë sezon ka ende shanse për ta përmirësuar shifrën me kalimin e mundshëm në finale. Simone është shndërruar në një element të rëndësishëm në kampin zikaltër dhe gjithmonë e më shumë është shndërruar në një trajner që di shumë mirë se si të menaxhojë situatat.