Kreu i Partisë së Lirisë, Ilir Meta, përmes një reagimi në rrjetet sociale, ka bërë thirrje për mbështetje ndaj programit të tij ekonomik, duke premtuar ulje të ndjeshme të taksave dhe stimuj fiskalë për biznesin dhe qytetarët.
Sipas Metës, qeverisja e Edi Ramës ka rritur taksat dhe tarifat, duke rënduar jetesën e shqiptarëve. Ai theksoi se votimi më 11 maj për programin ekonomik “Made in Albania” do të sjellë një ekonomi më të fuqishme dhe më shumë vende pune të mirëpaguara.
Në planin ekonomik të opozitës, Meta premton taksë të sheshtë 10%, heqjen e taksave për biznesin e vogël, uljen e TVSH-së në 15% dhe çmim më të ulët të energjisë për bizneset. Gjithashtu, ai propozon përjashtime tatimore për të rinjtë dhe gratë sipërmarrëse, si dhe lehtësime për investitorët në Shqipëri.
Sipas tij, kjo paketë do të ulë koston e jetesës dhe do të çlirojë ekonominë familjare dhe kombëtare. Ai u bëri thirrje qytetarëve të votojnë për koalicionin “PD-Aleanca për Shqipërinë Madhështore” dhe për kandidaturën e tij në Qarkun Tiranë.