Partizani nisi një cikël të ri me presidentin Gaz Demi. Në vitin 2021 të tjerë lojtarë mbërritën dhe duket se ekipi po rindërtohet përsëri tani, pasi epoka 3 vjeçare duket drejt përfundimit me largimet e Carës, Hadrojt dhe Rrapajt.
Më shumë lojtarë pritet të shiten madje, si Mba që po lakmohet në Slloveni apo ndonjë aset i fshehur. Kjo periudhë sa i takon bilanceve flet mirë për klubin e kuq.
Nga janari i 2023-it e deri tani janë arkëtuar afro 4.1 milionë euro, një shifër e jashtëzakonshme për një ekip të Superiores.
Rekordin e mban Skuka që shkoi te Metz në Francë për afro 1.4 milionë euro, edhe pse aventura e tij nuk ishte e duhura. “Demat” do të marrin 600 mijë euro nga Rrapaj, teksa shifra për Tedi Carën mbetet e pasaktësuar.
Epoka “Demi” ka shenjuar arritje të pakapshme si në trofe dhe në aspektin ekonomiko-financiar. Presidenca ka bërë punë të shkëlqyer duke menaxhuar lojtarët e duke i shitur nëpër klube big për numra të majme.