Fabio Paratici te Milani, tashmë mungon vetëm zyrtarizimi.
Ish-drejtori sportiv i Juventusit gjatë periudhës së nëntë titujve radhazi në Serinë A, aktualisht i pezulluar deri më 20 korrik, do të rikthehet në drejtimin e një klubi italian me synimin për të ringritur kuqezinjtë.
Një objektiv që do ta ndjekë falë njohurive të tij të thella për tregun dhe aftësisë për të zbuluar talente të mëdha.
Pavarësisht çështjeve të mëvonshme me drejtësinë sportive, mbi këto baza ai ndërtoi vitet e arta të Juventusit, fillimisht në bashkëpunim me Marotta-n dhe më pas i vetëm.
Shumë vite me goditje të suksesshme, por edhe investime të kushtueshme.
Askush si Cristiano Ronaldo
Në krye të listës qëndron portugezi dhe nuk mund të ishte ndryshe. Duke rindërtuar dhjetë blerjet më të shtrenjta të Paratici-t gjatë karrierës së tij si drejtues sportiv, spikat transferimi i Cristiano Ronaldos, për të cilin Juventus pagoi 117 milionë euro te Real Madridi.
Një marrëveshje që, në planin afatgjatë, ndikoi negativisht në financat e klubit dhe shënoi fillimin e rënies së Juventusit, por në atë kohë u cilësua si “goditja e shekullit”.
Podiumi bardhezi
Shumica e blerjeve më të kushtueshme të Paratici-t janë të lidhura me periudhën e tij tek Juventusi, veçanërisht në fazën e dytë të drejtimit të tij.
Në vend të dytë dhe të tretë qëndrojnë Gonzalo Higuain dhe Matthijs De Ligt, dy lojtarë të ndryshëm, por me një kosto të ngjashme.
Një detaj interesant lidhet me Dejan Kulusevskin: jo vetëm që sulmuesi suedez mbyll këtë top 10 me transferimin e tij nga Juventusi te Tottenham (në formë huazimi me detyrim blerjeje), por ai është edhe “i pari i përjashtuar”.
Juventusi pagoi plot 39 milionë euro për ta marrë nga Atalanta, por më pas e largoi pa shumë hezitim.
10 blerjet më të shtrenjta në karrierën e Fabio Paratici-t
Cristiano Ronaldo (Juventus) – 117 milionë euro
Gonzalo Higuain (Juventus) – 90 milionë euro
Matthijs De Ligt (Juventus) – 85,5 milionë euro
Arthur Melo (Juventus) – 80,6 milionë euro
Richarlison (Tottenham) – 58 milionë euro
Cristian Romero (Tottenham) – 52 milionë euro
Paulo Dybala (Juventus) – 41 milionë euro
Joao Cancelo (Juventus) – 40,4 milionë euro
Dejan Kulusevski (Tottenham) – 40 milionë euro*
Douglas Costa (Juventus) – 40 milionë euro
Federico Bernardeschi (Juventus) – 40 milionë euro