Një zyrtar i lartë venezuelian deklaroi të dielën se qeveria e vendit do të qëndrojë e bashkuar pas Presidentit Nicolas Maduro, kapja e të cilit nga SHBA-të ka shkaktuar pasiguri të thellë rreth asaj që e pret më pas kombin e pasur me naftë të Amerikës së Jugut.
Maduro ndodhet në një qendër paraburgimi në Nju Jork duke pritur një paraqitje në gjykatë të hënën për akuza për drogë, pasi Presidenti i SHBA-së Donald Trump urdhëroi largimin e tij dhe tha se SHBA-të do të merrnin kontrollin e Venezuelës. Por në Karakas, zyrtarët e lartë në Qeverinë e Maduros, të cilët e kanë quajtur ndalimin e Maduros dhe gruas së tij Cilia Flores një rrëmbim, ishin ende në krye.
“Uniteti i forcës revolucionare është më se i garantuar, dhe këtu ka vetëm një president, emri i të cilit është Nicolas Maduro Moros. Askush të mos bjerë pre e provokimeve të armikut”, tha ministri i Brendshëm Diosdado Cabello në një audio të ndarë nga partia socialiste në pushtet PSUV të dielën, ndërsa bëri thirrje për qetësi.
Zëvendëspresidentja Delcy Rodriguez, e cila shërben gjithashtu si ministre e naftës, ka marrë përsipër detyrën si udhëheqëse e përkohshme me bekimin e gjykatës së lartë të Venezuelës, megjithëse ajo ka thënë se Maduro mbetet president.
Për shkak të lidhjeve të saj me sektorin privat dhe njohurive të thella për naftën, burimin kryesor të të ardhurave të vendit, Rodriguez është konsideruar prej kohësh si anëtarja më pragmatike e rrethit të ngushtë të Maduros, por ajo e ka kundërshtuar publikisht Trumpin në pretendimet e tij se është e gatshme të bashkëpunojë me SHBA-në.
Qeveria e Venezuelës ka thënë për muaj të tërë se fushata e presionit e Trump është një përpjekje për të marrë në zotërim burimet e mëdha natyrore të vendit, veçanërisht naftën e tij, dhe zyrtarët kanë marrë shumë parasysh komentet e Trump të së shtunës mbi këtë temë, kur ai tha se kompanitë e mëdha të naftës amerikane do të hynin në vend.
“Jemi të indinjuar sepse në fund gjithçka u zbulua se ata duan vetëm naftën tone”, shtoi Cabello, i cili ka lidhje të ngushta me ushtrinë.
Kompania shtetërore e naftës e Venezuelës PDVSA po u kërkon disa prej ndërmarrjeve të saj të përbashkëta të ulin prodhimin e naftës bruto duke mbyllur fushat e naftës ose grupet e puseve për shkak të një paralize të eksportit, thanë për Reuters tre burime pranë vendimit.
Eksportet e naftës nga vendi i OPEC-ut mbeten në ndalesë që kur SHBA-të muajin e kaluar njoftuan një bllokadë ndaj cisternave të sanksionuara që lëvizin brenda dhe jashtë ujërave të Venezuelës dhe sekuestrimin e dy ngarkesave me naftë.
Dikur një nga vendet më të begatë në Amerikën Latine, ekonomia e Venezuelës ra më tej nën drejtimin e Maduros, duke dërguar rreth një në pesë venezuelianë jashtë vendit në një nga eksodet më të mëdha në botë.