Partia Socialiste synon 22 mandate deputetësh në Qarkun e Tiranës në zgjedhjet e 11 majit. Deklarata është bërë nga deputeti socialist Xhemal Qefalia, i cili garon në listën e hapur të kandidatëve socialistë në qarkun e Tiranës.
Në studion e Abcnews, Qefalia tha se PS nuk ka kundërshtarë dhe se nuk ka aspak konkurrencë me PD, por misioni kryesor i mazhorancës është “pasaporta europiane”.
“Unë vij direkt nga fushata dhe më besoni që kontakti me qytetarët është një ambicie për të punuar më shumë, pasi është shumë vlerësues. Me shumë rëndësi është pasaporta e BE dhe besoj që qytetarët do të dinë të votojnë sërish sepse duke votuar PS do të votojnë për të ardhmen e fëmijëve të tyre. misioni i kësaj mazhorance ka qenë ambicioz.
Kryeministri Rama ka pasur përfaqësimin më dinjitoz në kancelaritë europiane dhe e ka bërë tashmë Shqipërinë tashmë jo një vend të vogël siç edhe shikohej e syrin e indiferecës. Ambicia e kësaj mazhorancë është se jemi në momentin që ta çojmë Shqipërinë me të gjitha sferat dhe disiplinat drejt rrugës së BE.
Ne besojmë se Tirana do të diskutojë 21-22 mandate,. Me qëllim që të jetë një fitore e madhe. Për të qenë realist besoj që 22 mandate për PS janë të realizueshme.
Dhe të mos keqkuptohemi, ne nuk kemi konkurrencë. Ne punojmë si skuadër dhe sfidën e kemi me ambiciet që ne kemi për ta çuar në BE. Kolegët e PD janë një pjesë që kanë garantuar vendet e tyre në listë të sigurt dhe nuk shohim asgjë veçse flluska”, tha ai.