Spitalet në Kinë janë mbipopulluar pasi vendi po sheh një rritje të një virusi që shkakton probleme me frymëmarrjen, i njohur si metapneumovirus njerëzor (HMPV).
Kjo ka bërë që të krijohet një frikë në të gjithë botën, pasi skenat e përhapjes së virusit HMPV ishin të ngjashme me shpërthimin fillestar të Covid.
Lidhur me këtë ka folur në emisionin “ABC e Mëngjesit”, mjeku epidemiolog Ilir Alimehmeti, i cili ka deklaruar se mundësitë që ky virus të kthehet në pandemi janë shumë të ulëta.
Ai ka theksuar se HMPV ka qenë mes nesh dhe vite më përpara, nuk u shfaq në Kinë, por ka një arsye pse është përhapur atje.
“Nuk është virus i ri, por është identifikuar në Holandë në 2001. ka ekzistuar dhe më përpara. Në studimet e njerëzve do të thotë që ka qene dhe vite më përpara.
Por pse ndodhi në Kinë? Për të larë ato ‘haraçet’ e tre viteve mbyllje. Ata qendruan të izoluar dhe frenuan të gjitha viruset, duke u mbyllur. Ky virus këtu ka qenë. Të gjithë e kemi kaluar një herë. Ky thjesht nuk jep imunitet të plotë, ç’ka do të thotë që pas dy vjetësh ti mund të infektohesh prapë. Por Kina duke qenë e mbyllur nuk e ka prekur.
Ky virus mundësitë për të shkaktuar pandeminë i ka shumë të ulëta. Gripi i ka mundësitë që kthehet në pandemi, por jo ky virus”, u shpreh mjeku.