Institucionet që operojnë në fushën e mikrokredisë dhe financimeve alternative kanë realizuar një fitim neto prej 3 miliardë lekësh në gjashtëmujorin e parë të vitit 2025. Kjo shumë përkthehet në rreth 30 milionë euro. 61% e portofolit të tyre i përket individëve që marrin hua për konsum, shëndet apo detyrime të menjëhershme.
Në këtë kategori përfshihen kompani si IuteCredit, Kredo al, NOA Finance, Fondi BESA, Final, Microcredit Albania dhe të tjera. Këto institucione aplikojnë norma interesi të larta dhe shpesh operojnë me kontrata të paqarta. Qindra familje kanë përfunduar në borxhe të pashlyeshme dhe pasoja të rënda sociale.
Pavarësisht se Banka e Shqipërisë njofton për ulje të kredive me probleme në 12%, praktika tregon se shumë kredi ristrukturohen me kushte të reja. Kjo zgjat afatet e shlyerjes dhe rrit barrën e interesave. Përfitimi financiar i kompanive rritet, ndërsa qytetarët hyjnë në spirale borxhesh.
Ndërhyrjet ligjore kanë vendosur kufizime për numrin e kredive dhe raportin borxh/të ardhura, por mekanizmat e fitimit mbeten të njëjtë. Komisionet e fshehura, penalitetet për vonesa minimale dhe mungesa e transparencës janë të zakonshme. Ligji nuk garanton ende mbrojtje efektive për qytetarët përballë këtyre kompanive.