Kryeministri Edi Rama ka mohuar akuzat se ai është “Kumbari” i Shqipërisë, ndërsa vendi po përballet me javë të tëra protestash kundër korrupsionit, të nxitura nga projekti i një resorti luksoz të lidhur me Jared Kushnerin, dhëndrin e presidentit amerikan Donald Trump.
E ashtuquajtura “Revolucioni i Flamingove” nisi si reagim ndaj planeve të Jared Kushnerit dhe Ivanka Trump për ndërtimin e një projekti me vlerë rreth 4 miliardë dollarë në një ishull dhe në afërsi të një rezervati natyror të njohur për flamingot. Protestuesit kanë kërkuar dorëheqjen e Ramës dhe ndjekjen e tij penale, duke argumentuar se korrupsioni sistemik po u mundëson investitorëve ndërkombëtarë të ndërtojnë në zona të mbrojtura.
“Njerëzit thonë se unë jam udhëheqësi i gjithë kësaj. Unë u them shkoni në djall. Kaq e thjeshtë”, deklaroi Rama. “Nuk është detyra ime të provoj se nuk jam Kumbari; është detyra e tyre të provojnë se jam.”
Protestat kulmuan në Tiranë, ku mijëra qytetarë kanë dalë në rrugë për më shumë se tre javë radhazi, duke kundërshtuar projektin turistik dhe duke kërkuar më shumë transparencë në vendimmarrjen publike.
Ndërkohë, Prokuroria e Posaçme Kundër Korrupsionit dhe Krimit të Organizuar ka lëshuar urdhër-arreste për më shumë se një duzinë biznesmenësh të dyshuar për trafik ndërkombëtar droge dhe pastrim parash. Mes tyre ndodhet edhe një person që më parë kishte në pronësi toka në zonën ku parashikohet të zhvillohet projekti i Kushnerit dhe Ivanka Trump.
Një zëdhënës i Kushnerit dhe partnerëve të tij në Shqipëri nuk iu përgjigj kërkesave për koment.
Rama këmbënguli se investimet e lidhura me Kushnerin janë kryer në përputhje me ligjin dhe se nuk ekziston asnjë lidhje mes projektit dhe hetimeve ndaj ish-pronarëve të tokës.
“Të thuash se ekonomia shqiptare bazohet në pastrimin e parave është e tmerrshme”, deklaroi ai në një intervistë për Financial Times nga zyra e tij në Tiranë.
Ai pranoi se pastrimi i parave ekziston si fenomen ekonomik, por argumentoi se ndikimi i tij nuk është aq i madh sa pretendohet.
“Pastrimi i parave është pjesë e ekonomisë sonë, por nuk është një problem kaq i madh. Mendoni se nuk ka pastrim parash në Londër? Ka. Por a mund të thuhet se ekonomia britanike mbështetet kryesisht te pastrimi i parave? Jo”, tha Rama.
Sipas prokurorëve shqiptarë, 20 biznesmenë dyshohen për përfshirje në rrjete ndërkombëtare të trafikut të drogës dhe pastrimit të parave. Hetuesit dyshojnë se miliarda euro janë kanalizuar drejt projekteve të mëdha të ndërtimit përgjatë bregdetit të Adriatikut dhe në kryeqytetin shqiptar.
Mes personave nën hetim është edhe Artur Shehu, shtetas me nënshtetësi shqiptare dhe amerikane, i cili jeton në Miami. Në vitin 2025 ai shiti toka pranë rezervatit natyror ku folezojnë flamingot kompanisë Albania Land Development, e lidhur me projektin e Kushnerit. Kjo marrëveshje është vënë nën shqyrtim nga prokurorët antikorrupsion, të cilët kanë ngrirë pagesa me vlerë 128 milionë euro deri në përfundimin e hetimeve.
Shehu nuk iu përgjigj kërkesave për koment.
Rama argumentoi se qeveria e tij u ka dhënë institucioneve të drejtësisë më shumë hapësirë për të ndjekur rastet e korrupsionit dhe krimit të organizuar, gjë që sipas tij ka krijuar perceptimin se Shqipëria është më e korruptuar se më parë.
“Në fakt është e kundërta. Shqipëria po lufton korrupsionin si kurrë më parë dhe sot është shumë më pak e korruptuar sesa ka qenë”, tha ai.
Kryeministri përsëriti gjithashtu pretendimet se protestat janë nxitur edhe nga kundërshtarë të presidentit amerikan Donald Trump, përfshirë Iranin.
“Ka shumë interesa për ta vrarë këtë projekt, sepse lidhet me Trumpin”, u shpreh Rama. “Po të mos ishte Jared Kushneri, askush nuk do të merrej me flamingot, me Shqipërinë apo me ndonjë gjë tjetër. E gjithë kjo vëmendje vjen nga kundërshtia ndaj Trumpit.”
Ai tha se mbetet i bindur se planet për zhvillimin e kompleksit turistik në bregdet do të realizohen pavarësisht protestave.
“E rëndësishme është që investitorët nuk janë kriminelë dhe nuk janë të përfshirë në pastrim parash”, deklaroi Rama. “Ata janë investitorë të mëdhenj. Kjo është një mundësi historike për Shqipërinë.”/ Financial Times